Ellefu fórnarlambanna í framboði fyrir Verkamannaflokkinn

Ellefu af þeim ungmennum sem féllu fyrir hendi fjöldamorðingjans Anders Behring Breivik í Útey höfðu boðið sig fram til komandi sveitarstjórnarkosninga í Noregi. Þetta kemur fram á vef norska ríkissjónvarpsins í dag. Þar staðfestir Liv Signe Navarsete ráðherra að ellefu af fórnarlömbunum í Útey séu á framboðslistum norska Verkamannaflokksins fyrir sveitarstjórnarkosningarnar. Hún segir jafnframt að samkvæmt kosningalögum í landinu megi ekki tilnefna nýja fulltrúa á listana. Listar með nöfnum hinna látnu muni við kosningarnar teljast með.