Silfuræði runnið á almenning í Danmörku

Miklar hækkanir á heimsmarkaðsverði á silfri í ár hafa valdið því að silfuræði er runnið á frændur vora Dani.

Danskur almenningur hefur leitað í kompum sínum og geymslum að gömlum silfurmunum og erfðasilfri sínu, tekið það fram og pússað af því rykið og síðan arkað með góssið til næsta skartgripasala. Þar er silfrið selt dýrum dómum og margir fara heim með fleiri danska þúsundkalla í vasanum.

Fjallað er um málið í Jyllandsposten en þar kemur fram að heimsmarkaðsverð á silfri hefur hækkað um 30% það sem af er árinu. Rætt er við gullsmiðinn Flemming Falck í Frederikssund sem segir að velta sín í gull og silfurkaupum hafi tífaldast milli ára. Hann hafi því opnað sérstaka búð í Árósum þar sem eingöngu er keypt gull og silfur.

Að sögn Falck koma margir með silfurgripi til hans sem hafa verið í eigu sömu fjölskyldu kynslóðum saman en hafa gert lítið annað en safna ryki undanfarna áratugi.