Fitch Ratings setur lánshæfi Grikklands tímabundið í gjaldþrot

Matsfyrirtækið Fitch Ratings hefur fellt lánshæfiseinkunn Grikklands tímabundið niður í D eða gjaldþrot. Reiknað er með að einkunnin komist aftur upp í ruslflokk eftir nokkra daga.

Við þessu var búist enda höfðu öll stóru matsfyrirtækin þrjú varað við því að endurskipulagning á skuldum Grikklands myndi hafa þessi áhrif.

Í frétt um málið á Reuters segir að leiðtogar evrusvæðisins hafi lagt fram ítarlega áætlun á fundi sínum fyrir helgina um hvernig ætti að bregðast við tímabundnu gjaldþroti Grikklands.

Rætt er við David Riley yfirmann þjóðríkjamats hjá Fitch en hann segir að eðli aðkomu einkageirans, það er bankakerfisins, að neyðaraðstoðinni feli í sér ígildi takmarkaðs gjaldþrots. Þar á hann við að auk 109 milljarða evra sem koma frá ESB og AGS eiga bankar að leggja til 50 milljarða evra í formi lánalenginga til allt að 30 ára og mikillar lækkunar á vöxtum. Fyrir bankana er þetta biti upp á vel yfir 8.000 milljarða króna sem er meir en fimmföld landsframleiðsla Íslands.



Riley reiknar með að þegar búið verði að ganga frá lánalengingum og vaxtabreytingum muni Grikkland aftur fá einkunnina CCC eða jafnvel B en það er samt sem áður frekar léleg rusleinkunn.