Harry Potter sló met og halaði inn 20 milljörðum

Síðasta myndin um galdrastrákinn Harry Potter sló öll met í miðasölu um helgina en talið er að hún hafi halað inn 168 milljónir bandaríkjadollara, eða tæplega 20 milljarðra íslenskra króna. Það er það lang mesta sem hefur komið í kassann á frumsýningarhelgi bíómyndar en fyrir helgina var Batmanmyndin Dark Knight í fyrsta sæti með 158 milljónir dollara.

Myndin sem ber nafnið, Harry Potter and the Deathly Hallows: Part 2, er áttunda og síðasta myndin um galdrastrákinn sem hefur notið gríðarlegra vinsælda um allan heim. Hluti af skýringunni á því hversu mikið myndin þénaði er sú að hún er í þrívídd og miðarnir á þrívíddarmyndir eru örlítið dýrari en miðarnir á myndir í tvívídd.

Á föstudeginum halaði myndin inn meira í tekjur en fjórar af sjö myndunum um Harry Potter gerðu á heilli frumsýningarhelgi. Dreifingafyrirtækið Warner Bros segir að kvikmyndin hafi halað inn 92 milljónir bandaríkjadala, tæplega 11 milljarðra íslenskra króna. Þetta er 20 milljónum dölum, eða 2,3 milljörðum, meira en The Twilight Saga: New Moon halaði inn fyrir tveimur árum á fyrsta degi.