Kínverskar bankaskuldir vantaldar um 62 þúsund milljarða

Matsfyrirtækið Moody´s segir að skuldir sveitastjórna í Kína við innlenda banka séu vantaldar um 540 milljarða dollara eða um rúmlega 62 þúsund milljarða kr. Sökum þessa sé hætta á að lánshæfiseinkunnir kínversku bankanna muni lækka í bókum Moody´s.

Fjallað er um málið á Reuters og Bloomberg fréttaveitunni. Þar segir að Moody´s hafi farið yfir nýlega skýrslu Ríkisendurskoðunnar Kína um skuldir bankakerfisins þar í landi og þetta sé niðurstaða matsfyrirtækisins.

Þá kemur fram í áliti Moody´s að þar að auki hafi kínversk stjórnvöld ekki neina áætlun til að mæta þeim vanda sem skapast hefur vegna gengdarlausra lánveitinga kínversku bankanna til sveitastjórna í landinu.