Nadal og Federer áfram - Söderling úr leik

Rafael Nadal og Roger Federer komust báðir áfram í 16-manna úrslit í einliðaleik karla á Wimbledon-mótinu í tennis í dag. Öllum viðureignum í 32-manna úrslitum í kvenna- og karlaflokki er lokið.

Nadal vann Gilles Müller frá Lúxemborg í þremur settum, 7-6, 7-6 og 6-0. Viðureignin hófst reyndar í gær en þá þurfti að hætta leik vegna rigningar. Nadal mætir Juan Martin Del Potro frá Argentínu í næstu umferð.

Nadal gæti mætt Roger Federer í úrslitunum en sá síðarnefndi vann fremur þægilegan sigur á David Nalbandian frá Argentínu í dag, 6-4, 6-2 og 6-4.

Federer féll úr leik í fjórðungsúrslitum Wimbledon-mótsins í fyrra en hann hefur alls sex sinnum unnið þennan titil. Í ár fær hann því aftur tækifæri til að jafna met Bandaríkjamannsins Pete Sampras sem vann Wimbledon-titilinn alls sjö sinnum á ferlinum.

Federer hefur reyndar verið í lægð að undanförnu og ekki unnið stórmót síðan hann fann opna ástralska meistaramótið í janúar í fyrra.

Af öðrum úrslitum má nefna að Svíinn Robin Söderling, fimmti efsti maður á styrkleikalistanum, féll úr leik þegar hann tapaði fyrir Ástralanum Bernard Tomic, 6-1, 6-4 og 7-5. Tomic er aðeins átján ára gamall og í 158. sæti heimslistans.

Þá vann Novak Djokovic sigur á Kýpverjanum Marcos Baghdatis, 4-6, 6-4, 6-3 og 6-4 í frábærri viðureign en það tók Djokovic meira en tíu mínútur að vinna síðustu lotuna.

Í kvennaflokki eru fjórar af tíu efstu á styrkleikalistanum fallnar úr leik en Williams-systurnar, Venus og Serena, eru enn á meðal keppenda sem og þær Caroline Wozniacki frá Danmörku og Maria Sharapova frá Rússlandi.

Williams-systur hafa nánast einokað þetta mót síðustu ár og unnið í níu skipti af síðustu ellefu. Venus í alls fimm skipti og Serena fjögur.

16-manna úrslit karla:

Rafael Nadal (Spáni) - JM del Potro (Argentínu)

Mardy Fish (Bandaríkjunum) - Tomas Berdych (Tékklandi)

Andy Murray (Bretlandi) - Richard Gasquet (Frakklandi)

Lukas Kubot (Póllandi) - Feliciano Lopez (Spáni)

David Ferrer (Spáni) - Jo-Wilfried Tsonga (Frakklandi)

Mikhail Youzhny (Rússlandi) - Roger Federer (Sviss)

Bernard Tomic (Ástralíu) - Xavier Malisse (Belgíu)

Michael Llodra (Frakklandi) - Novak Djokovic (Serbíu)

16-manna úrslit kvenna:

Caroline Wozniacki (Danmörku) - Dominika Cibulkova (Slóvakíu)

Shuai Peng (Kína) - Maria Sharapova (Rússlandi)

Sabine Lisicki (Belgíu) - Petra Cetkovska (Tékklandi)

Marion Bartoli (Frakklandi) - Serena Williams (Bandaríkjunum)

Tamira Baszek (Austurríki) - Ksenia Pervak (Rússlandi)

Nadia Petrova (Rússlandi) - Victoria Azarenka (Hvíta-Rússlandi)

Petra Kvitova (Tékklandi) - Yanina Wickmayer (Belgíu)

Venus Williams (Bandaríkjunum) - Tsvetana Pironkova (Búlgaríu)