Walker leitar að 1,5 milljarða punda láni til kaupa á Iceland

Malcolm Walker stofnandi og forstjóri Iceland keðjunnar ætlar ekki að gefast auðveldlega upp við að ná henni aftur í sína eigu.

Eins og fram hefur komið í fréttum er Walker nú að leita að stóru sambankaláni til að fjármagna kaup sín á 67% hlut skilanefndar Landsbankans í Iceland Foods keðjunni. Hefur hann meðal annars rætt við Goldman Sachs einn stærsta fjárfestingabanka heimsins um lánveitingu.

Í umfjöllun vefsíðunnar management today um málið kemur fram að Walker er að reyna að útvega sér lán upp á 1,5 milljarð punda til að kaupa hlut skilanefndarinnar. Þar með verðleggur hann Iceland í heild upp á yfir tvo milljarða punda eða rúmlega 370 milljarða króna en Walker á sjálfur tæplega fjórðungshlut í keðjunni.

Það verður á brattan að sækja fyrir Walker því nokkrir fjársterkir aðilar hafa sýnt mikinn áhuga á að kaupa Iceland, þar á meðal eru verslunarkeðjur eins og Morrison, Asda og Sainsbury.

Walker hefur þó forskot á þessa aðila þar sem hann hefur samkvæmt samningi rétt á að jafna og ganga inn í öll tilboð sem berast í hlut skilanefndarinnar.