Eyjastúlkur áfram með fullt hús eftir sigur á Blikum

Nýliðar ÍBV héldu sigurgöngu sinni áfram í Pepsi-deild kvenna og tryggðu sér aftur toppsætið með 2-0 sigri á Breiðabliki í Kópavogi í kvöld. Eyjakonur eru eina liðið í deildinni með fullt hús eftir þrjár umferðir og tók toppsæti aftur af Íslandsmeisturum Vals sem höfðu tekið það af þeim í gær. Blikakonur sitja hinsvegar áfram í hópi neðstu liða með aðeins eitt stig í húsi af níu mögulegum.

Vesna Smiljkovic og Danka Podovac skoruðu mörk Eyjaliðsins í leiknum í sitthvorum hálfleiknum og ætla heldur betur að reynast nýliðunum happafengur en þær komu til liðsins frá Þór/KA fyrir tímabilið.

Eftir slaka byrjun vann Blikaliðið sig inn í leikinn og tókst að skapa sér fullt af vænlegum tækifærum en þegar kom að því að klára þau gekk ekkert upp. Eyjaliðið varðist vel og ógnaði alltaf með hröðum upphlaupum.

Birna Berg Haraldsdóttir, markvörðurinn ungi sem kom frá FH, er því ekki enn búin að fá á sig mark í sumar en hún stóð vaktina vel í Eyjamarkinu í kvöld og varði nokkrum sinnum mjög vel frá Blikastúlkum.

Vesna Smiljkovic kom ÍBV í 1-0 á 13. mínútu þegar hún stakk Blikavörnina af eftir að hafa fengið sendingu frá Kristínu Ernu Sigurlásdóttur. Eftir markið vann Blikaliðið sig inn í leikinn og skapaði sér fullt af færum fram að hálfleik.

Greta Mjöll Samúelsdóttir var mjög nálægt því að jafna leikinn á 20. mínútu en Birna Berg Haraldsdóttir varði þá frábærlega óvænt skot hennar eftir fyrirgjöf Fanndísar Friðriksdóttur. Greta og Fanndís voru allt í öllu sóknarleik Blika og áttu eftir að skapa fleiri færi fram að hálfleik.

Leikurinn var rólegri í seinni hálfleik en Danka Podovac kom ÍBV í 2-0 á 70. mínútu með sínu fimmta marki í sumar og gerði nánast út um leikinn með því. Danka fékk boltann frá Berglindi Björgu Þorvaldsdóttur og lék skemmtilega á markvörð Blika áður en hún skoraði.