Tískukóngurinn Kevin Stanford klórar í bakkann

Fyrir aðeins tveimur árum horfði tískukóngurinn Kevin Stanford fram á eitt stærsta persónulega gjaldþrot sögunnar í Bretlandi. Þessum fyrrum viðskiptafélaga Baugs og einum af stærstu skuldurum Kaupþings hefur hinsvegar tekist að klóra svo vel í bakkann að hann heldur enn hluta af fyrra veldi sínu.

Í The Observer, sunnudagsblaði The Guardian, er að finna ítarlega úttekt á viðskiptaferli Kevin Stanford en sá ferill sogaðist niður í hringiðu bankahrunsins á Íslandi. Langur listi af eignum Stanford komst í hendur skilanefnda íslensku bankanna eða urðu gjaldþrota. Meðal þessara eigna má nefna Woolworths, Marks & Spencer, Moss Bros, Debenhams, Booker, French Connection, Mulberry, Ghost, Karen Millen, Oasis, Principles and Warehouse.

Þá var Kevin Stanford  um tíma fjórði stærsti hluthafinn í Kaupþingi á sama tíma og sá banki hafði veitt honum lán upp á samtals 450 milljónir punda eða um 84 milljarða kr. á núvirði. Þessi viðskipti eru til rannsóknar m.a. hjá sérstökum saksóknara.

Í dag hefur Stanford náð aftur 15% hlut í tískukeðjunni All Saints með aðstoð bandarískra fjárfesta. Hann heldur enn rándýru 16. aldar sveitasetri sínu í Kent, þótt það sé nú raunar veðett að hluta. Þá stjórnar hann enn þyrluleigu- og limmósínþjónustu. Og Stanford er enn skráður, a.m.k. að nafninu til, fyrir hlut í House of Fraser og fasteignafélagi um stórmarkað.

Þessi auðæfi Stanfords eru þó ekki nema svipur hjá sjón miðað við fyrir nokkrum árum. Stanford var áður í hópu auðugustu manna í breska tískugeiranum með auðæfi upp á 220 milljónir punda. Hann náði ekki inn á lista Sunday Times um auðugustu menn Bretlands á síðustu þremur árum.

Hvað Kaupþing varðar á Stanford í málaferlum við þrotabú Singer & Friedlander (KSF) dótturbanka Kaupþings í Bretlandi. Nýlega var lekið bréfi frá lögmönnum Stanford þar sem þeir hóta að leggja fram 130 milljóna punda mótkröfu á hendur KSF þar sem stjórnendur bankans hafi blekkt Stanford. Stjórnendur KSF í London, Reykjavík og Lúxemborg hafi notað Stanford án hans vitneskju í ólöglegum ráðagerðum um að auka virði hlutafjár í hinum deyjandi banka, að því er segir í The Observer.

Nefnt er til sögunnar að bræðurnir Robert og Vincent Tchenguiz halda því einnig fram að stjórnendur Kaupþings hafi blekkt þá með sama hætti.