Barrichello vongóður um framfaraskref

Williams liðið hefur ekki riðið feitum hesti frá mótum ársins, en reynsluboltinn Rubens Barrichello sem ekur með liðinu ásamt nýliðanum Pastor Maldonado vonast eftir að Williams bíllinn verði betri á Katalóniu brautinni á Spáni um næstu helgi, en í fyrstu fjórum mótum ársins.

Tæknistjóri liðsins, Sam Michael segir að Williams hafi unnið að því að útfæra nýja afturvængi, sem liðið prófaði á æfingum á Istanbúl Park brautinni í Tyrklandi á dögunum. Áætlun liðsins er að nota þessa nýju vængi um helgina auk fleiri nýjunga. Barrichello telur að brautin sem notuð er um helgina og er nærri Barcelona sé frábær braut og ein af þeim sem ökumenn þekkja hvað best.

„Það verður fróðlegt að sjá hve mikið önnur lið og ökumenn hafa þróast síðan við æfðum á brautinni í mars. Ég vona að við getum tekið gott framfaraskref með endurbótum sem verða í bílnum. Ég er jákvæður á að það verði rauninn", sagði Barrichello í fréttatilkynningu frá Williams.

Hinn spænskumælandi Maldonado frá Venúsúela ekur hinum Williams bílnum.

„Þetta verður áhugavert mót, þar sem okkur hefur gefist tími til að þróa bílinn. Við erum með meiri gögn, þar sem við æfðum þar í vetur og það ætti að gera hlutina auðveldari en ella. Þetta verður auðveldara fyrir mig, þar sem ég hef ekið FW33 bílnum á brautinni", sagði Maldonado.

„Við munum vinna að því að bæta bílinn með nýju hlutunum og sjá hvernig þetta kemur út. Ég kann vel við brautina og ég tel brautina eina af þeim bestu, hún er tæknileg og góð blanda af háhraða og hægum beygjum. Trúlega er beygja þrjú í uppáhaldi, en hún er mjög löng og hröð", sagði Maldonado.