Hamilton: Einstök tilfinning að færa liðinu sigur

McLaren liðið og Lewis Hamilton tók ákveðna áhættu fyrir mótið í Sjanghæ í Kína varðandi keppnisáætlun og það skilaði gullinu í æsispennandi keppni. Hamilton sá við helsta keppinaut sínum í næst síðasta hring mótsins.

Hamilton fór framúr Sebastian Vettel á lokasprettinum og var að vonum kampakátur með dýrmæt stig í stigakeppni ökumanna.

„Keppnisáætlunin sem við notuðum gekk upp og þjónustuhléin voru frábær. Ég þurfti að passa upp á dekkin, eftir því sem ég jók hraðann. Þetta er eitt besta mót sem ég hef upplifað. Ég þurfti að fara framúr talsvert mörgum og bestu þakkir til liðsins. Þeir setja hjarta sitt í það að gera bílinn sem bestan og það er einstök tilfinning að færa þeim sigur", sagði Hamilton á fréttamannafundi eftir keppnina.

Litlu munaði að Hamilton næði ekki að taka stöðu sína á ráslínunni og munaði aðeins 30 sekúndum á því að hann þyrfti að hefja keppni á þjónustusvæðinu, þar sem hann var nálægt því að brjóta tímamörk.

Þjónustumenn hans höfðu ekki náð því að koma bílnum heim og saman í tæka tíð, en á endanum tókst að koma Hamilton úr þjónustuskýlið og á réttan stað inn á braut. Þetta lagði grunn að góðum sigri og dýrmætum stigum í stigakeppni ökumanna.