Kristján: Tilbúnir og heitir

Kristján Arason, annar þjálfara FH, segir sína menn ekki slegna út af laginu eftir tapið fyrir Fram um helgina. Liðin mætast í oddaleik í undanúrslitum úrslitakeppni N1-deildar karla í kvöld.

FH-ingar unnu sannfærandi sigur á Fram í fyrsta leik liðanna á heimavelli en töpuðu svo með eins marks mun í Safamýrinni um helgina.

„Ég er með góða tilfinningu fyrir þessum leik enda erum við tilbúnir og heitir,“ sagði Kristján í samtali við Vísi.

„Það er auðvitað alltaf erfitt að tapa en það er stutt á milli leikja og ekki annað í boði en að jafna sig hratt á því.“

„Við munum leggja leikinn upp á svipaðan máta og við höfum gert hingað til. Ég á von á spennandi leik en að hann geti einnig boðið upp á sveiflur innan leiksins.“

„Bæði lið spila hraðan bolta og við náðum að stöðva það í fyrsta leiknum. Framarar svöruðu því í næsta leik en vonandi náum við aftur að stoppa þá í kvöld, eins og við gerðum á fimmtudaginn.“

„Við þurfum að þétta vörnina og vera grimmari í sókninni. Það er það sem okkur skorti um helgina. Við lentum líka í mjög slæmum leikkafla þegar við misstum þrjá menn af velli með stuttu millibili og þeir skoruðu nokkur mörk á okkur. Við vonum að við lendum ekki í öðru eins í kvöld,“ sagði Kristján.

FH-ingar fóru mikinn í lokasprettinum í deildarkeppninni og segir Kristján að tapið um helgina hafi ekki dregið úr liðinu.

„Það er fullt sjálfstraust í liðinu. Við getum tapað leikjum en líka unnið alla og það höfum við sýnt. Það verður ekkert gefið eftir í kvöld og ætlum að láta verkin tala inn á vellinum.“

FH-ingum hefur verið hrósað fyrir góða umgjörð á sínum leikjum en Kristján segir aðalatriðið að bjóða upp á góðan handbolta.

„Mestu máli skiptir er að handboltinn sé góður og þess vegna hefur verið hægt að búa til svo góða umgjörð í kringum okkar leiki. Umgjörðin hefur verið algjörlega til fyrirmyndar og það er vonandi að það verði framhald á. Áhorfendur fá þá ekki bara góðan handbolta heldur eru líka mættir til að skemmta sér og eiga góða kvöldstund.“

Kristján segir að markmið FH-inga séu skýr og að það hafi ekkert breyst frá því í haust.

„Aðalmálið er að fara í úrslitin. Það hefur verið okkar markmið frá byrjun. Nú eigum við eina hindrun eftir og ætlum við okkur yfir hana og fara svo alla leið.“