Hörður Axel: Enginn í Keflavík hafði áhuga á sumarfríi

„Þetta er hrikalega sætur sigur. Við vorum með bakið upp við vegg og núna snúum við þessu einvígi við," sagði Hörður Axel Vilhjálmsson, leikmaður Keflavíkur, kátur í leikslok eftir frækinn sigur Keflavíkur á KR, 135-139, í mögnuðum leik í undanúrslitum Iceland Express deild karla í kvöld.

Staðan í einvíginu er því 2-1 fyrir KR eftir leik kvöldsins sem fór í framlengingu. Keflvíkingar reyndust sterkari í framlengingunni og innbyrtu sigurinn mikilvæga sem blæs lífi í möguleika liðsins á stóra titlinum.

„Við brotnuðum ekki þrátt fyrir að hafa misst leikinn í framlengingu og það kannski hjálpaði okkur hve nálægt við vorum að stela sigrinum í síðustu sókninni. Við mættum með sjálfstraust í framlenginguna. Það blundaði vafalaust í okkur sú hugsun að við máttum ekki tapa. Við teljum okkur vera með nógu gott lið til að verða Íslandsmeistarar og það hefur enginn áhuga í Keflavíkurliðinu að fara í sumarfrí á þessum tímapunkti," sagði Hörður sem skoraði 14 stig í kvöld.

„Staðan hjá okkur lítur mun betur út en hún var kl. 17:00 í dag. Núna mætum við einbeittir í leikinn á sunnudaginn. Það er alltaf mikið sjálftraust hjá Keflavík."