Lahm: Van Gaal varð að hætta

Philipp Lahm, leikmaður Bayern München, segir að það hafi verið rétt ákvörðun hjá forráðamönnum liðsins að slíta samstarfinu við Louis van Gaal knattspyrnustjóra.

Van Gaal mun hætta í lok leiktíðarinnar en Bayern er í fjórða sæti þýsku úrvalsdeildarinnar og fallið úr leik í Meistaradeild Evrópu og þýsku bikarkeppninni.

Félagið hefur ráðið Jupp Heynckes til að taka við liðinu en hann er nú stjóri Leverkusen sem er í öðru sæti deildarinnar.

„Það er rétt ákvörðun að skipta um stjóra en við höfum allir gert mistök - líka ég,“ sagði Lahm í samtali við þýska fjölmiðla.

„Við höfum ekki verið nógu traustir í vörninni og ekki nógu afkastamiklir fyrir framan mark andstæðingsins. En svona er lífið hjá Bayern - ef maður nær ekki árangri verður maður að taka afleiðingum þess.“

„Mér líst vel á Heynckes. Hann þekkir vel til hjá Bayern og þekkir forráðamenn liðsins vel. Þetta mun ganga vel hjá honum,“ sagði Lahm.