Sauber Formúlu 1 liðið ætlar að sýna japönsku þjóðinni stuðning

Formúlu 1 lið Sauber verður merktir í fyrsta móti ársins í Ástralíu með sérstakri kveðju til japönsku þjóðarinnar vegna hinna hörmulega atburða sem hafa átt sér stað í landinu að undanförnu. Japaninn Kamui Kobayashi er annar ökumanna Sauber liðsins.

Skilaboðum á japönsku verður komið fyrir á bíl Kobayahsi og Sergio Perez frá Mexíkó, sem einnig ekur hjá Sauber, samkvæmt frétt á autosport.com í dag og þau munu vera svona í lauslegri þýðingu. "Megi bænir okkar berast til fóllksins í Japan."

"Það er erfitt að finna réttu lýsingarorðin til að lýsa tilfinningum okkar", sagði Peter Sauber eigandi Sauber liðsins.

"Við getum varla trúað því sem við sjáum. Hugur okkar er með fólkinu í Japan. Við vonum að fólk hafi styrkinn til að vinna sig í gegnum þessar miklu erfiðleika."

Fyrsta Formúlu 1 mót ársins er í Melbourne í Ástralíu 27. mars og 24 ökumenn taka þátt í mótinu með keppnisliðum sínum.