Freyr: Stór áfangi bæði fyrir okkur og félagið

„Gríðarlega ánægður og stór áfangi bæði fyrir okkur og félagið. Bara stoltur," sagði Freyr Alexandersson, þjálfari Vals, eftir að hafa fagnað Íslandsmeistaratitlinum í dag.

„Það er engin spurning að við erum vel að þessum titli komin. Sumarið er búið að vera gott og við höfum verið betri aðilinn í öllum leikjunum nema á móti Fylki sem var eini leikurinn sem við töpuðum í sumar. En heilt yfir er ég rosalega ánægður með frammistöðu liðsins," sagði Freyr sáttur með titilinn en verður hann áfram?

„Það kemur bara í ljós á næstu vikum. Ég ætla að gefa mér tíma til að hugsa þetta og tala við leikmenn og skoða stöðuna hjá mér og þeim. Ég hef bara verið að hugsa um mitt lið og mína vinnu og það hefur gengið vel en ég verð fljótlega að setjast niður og skoða stöðuna," segir Freyr um framhaldið.