Formaður KKÍ: Þyrla er of mikið 2007

Annað kvöld er lokaumferð Iceland Express-deildar karla. KR og Grindavík eiga bæði möguleika á því að verða deildarmeistari.

KR leikur gegn Snæfelli í Stykkishólmi og Grindavík gegn ÍR í Seljaskóla.

Leikirnir verða á sama tíma og þar sem um tveggja tíma akstur er milli íþróttahúsanna er varla möguleiki að bíða með bikarinn á miðri leið.

Hannes Jónsson, formaður KKÍ, er í viðtali við vefsíðuna karfan.is vegna málsins þar sem hann segir hugmyndina að láta þyrlu fljúga með bikarinn hafi verið blásin af.

„Þessi hugmynd með þyrluna kom inn í umræðuna í dag en hún var fljótt blásin af, það væri eitthvað svo mikið 2007. Við náðum þó að leysa þetta á mjög farsælan hátt, þannig er að þegar lið verður deildarmeistari er afhentur eignabikar og farandbikar. Annar fer í Stykkishólm á fimmtudag og hinn í Seljaskóla," sagði Hannes við karfan.is.