Benedikt á leið til Þorlákshafnar

Körfuboltaþjálfarinn Benedikt Guðmundsson hefur tekið við þjálfun 1. deildarliðs Þórs frá Þorlákshöfn.

Þetta kom fram á sunnlenska.is í kvöld en Benedikt mun skrifa undir þriggja ára samning samkvæmt fréttinni. Hann gerði síðast kvennalið KR að Íslandsmeisturum. Þar áður vann hann titilinn í karlaflokki með KR.

Benedikt hætti á dögunum störfum hjá KR þar sem hann hefur verið lengst af á sínum ferli.

„Það var erfiðara að kveðja KR en maður reiknaði með [...] og KR-hjartað verður alltaf á sínum stað en það hjálpar að maður fer stoltur frá félaginu,“ sagði Benedikt í viðtali á körfunni.is í kvöld.

Þór varð í fimmta sæti 1. deildarinnar í vor.