Umfjöllun: Haukar gáfu tóninn

Haukar fengu fyrstu stig vetrarins í N1-deild karla er liðið vann góðan útisigur á Val í Vodafone-höllinni, 30-26.

Haukar tóku afgerandi forystu undir lok fyrri hálfleiks og voru með sjö marka forystu þegar flautað var til leikhlés, 20-13.

Munurinn varð snemma tíu mörk í þeim síðari og það var ekki fyrr en að varamenn Hauka fengu stærra hlutverk í leiknum að Valsmenn náðu að koma sér í takt við leikinn.

Niðurstaðan var fjögurra marka sigur sem fyrr segir en í raun var sigur Íslands- og bikarmeistaranna aldrei í hættu.

Aron Rafn Eðvarðsson kom inn á fyrir Birki Ívar Guðmundsson snemma í fyrri hálfleik og átti mjög góðan leik. Hann varði alls nítján skot í leiknum og var með 49 prósenta hlutfallsmarkvörslu.

Það var þó Björgvin Björgvinsson sem lagði grunni að sigri Hauka með mögnuðum leik í fyrri hálfleik. Hann skoraði þá helming marka Haukanna, tíu talsins, en alls skoraði hann tólf í leiknum. Hann var allt í öllu í sóknarleiknum og gaf fjölmargar stoð- og línusendingar.

Sóknarleikur Hauka var kröftugur og hraður og Valsvörnin réði engan veginn við hann, sérstaklega í fyrri hálfleik. Sóknarleikur Vals að sama skapi var nokkuð bitlaus lengst af í leiknum.

Ingvar Guðmundsson, markvörður Vals, hrökk svo í gang um miðbik seinni hálfleiks og náði þá að loka marki heimamanna í heilar sextán mínútur. En það skipti í raun engu máli - munurinn var orðinn það mikill að Valsmönnum dugði ekki tíminn sem eftir var í leiknum.

Valur - Haukar 26 - 30 (13-20)



Mörk Vals (skot): Anton Rúnarsson 7 (14), Sturla Ásgeirsson 5/3 (6/4), Valdimar F. Þórsson 5/3 (11/4), Gunnar Harðarson 4 (6), Finnur Ingi Stefánsson 2 (4), Arnar Guðmundsson 2 (6), Orri Freyr Gíslason 1 (2).

Varin skot: Ingvar Kr. Guðmundsson 10/1 (37/2, 27%), Friðrik Sigmarsson 0 (3/1).

Hraðaupphlaup: 4 (Anton 2, Finnur Ingi 1, Gunnar 1).

Fiskuð víti: 8 (Anton 4, Finnur Ingi 1, Gunnar 1, Arnar 1, Jón Björgvin 1).

Utan vallar: 4 mínútur.

Mörk Hauka (skot): Björgvin Þór Hólmgeirsson 12 (14), Heimir Óli Heimisson 7 (7), Guðmundur Árni Ólafsson 5/1 (8/1), Stefán Rafn Sigurmannsson 4/1 (7/2), Gísli Jón Þórisson 1 (2), Þórður Rafn Guðmundsson 1 (2), Tjörvi Þorgeirsson (2), Jónatan Ingi Jónsson (1).

Varin skot: Aron Rafn Eðvarðsson 19/2 (39/7, 49%), Birkir Ívar Guðmundsson 0 (6/1).

Hraðaupphlaup: 6 (Stefán Rafn 2, Björgvin Þór 2, Guðmundur Árni 1, Heimir Óli 1).

Fiskuð víti: 3 (Gísli Jón 1, Heimir Óli 1, Þórður Rafn 1).



Utan vallar: 8 mínútur.

Dómarar: Ingvar Guðjónsson og Jónas Elíasson. Komust vel frá verkefninu.