Umfjöllun: Stemningin allan tímann með Keflavík

Keflavík vann Snæfell örugglega 97-78 í fyrsta leik liðanna um Íslandsmeistaratitilinn í kvöld. Keflvíkingar eru því komnir í 1-0 í einvíginu.

Keflvíkingar eru gríðarlega sterkir á heimavelli sínum og voru með leikinn algjörlega í sínum höndum. Stemningin var á þeirra bandi og Snæfellingar áttu engin svör.

Snæfellingar fundu engan takt í varnarleik sínum í byrjun. Heimamenn voru með níu stiga forystu að loknum fyrsta leikhluta. Áfram héldu þeir að stjórna leiknum í öðrum fjórðung þar sem var þó lítið skorað. Hörður Axel Vilhjálmsson var funheitur.

Snæfell var að hitta illa og var tólf stigum undir í hálfleik, staðan 53-41. Hlynur Bæringsson var þó að skila sínu og var með 15 stig og 8 fráköst að loknum fyrri hálfleik.

Í þriðja leikhlutanum gerðu Keflvíkingar svo út um leikinn og höfðu 23 stiga forystu fyrir lokaleikhlutann. Eftir það var þetta bara spurning um hversu stór sigurinn yrði.

Heimamenn fögnuðu svo vel í leikslok en þó meðvitaðir um að einvígið er bara rétt að byrja. Draelon Burns, Urule Igbavboa og Hörður Axel Vilhjálmsson skoruðu allir tuttugu stig fyrir heimamenn.

Eftir leik sagði Hörður Axel Vilhjálmsson við blaðamann að umræðan um að úrslitaeinvígið um titilinn hafi í raun verið einvígi Snæfells og KR hafi hjálpað Keflvíkingum að mótivera sig. „Við erum komnir til að spila," sagði Hörður.

Snæfellingar virtust fljótlega hafa lagt árar í bát, sýndu ákveðið andleysi og þurfa að rífa sig upp fyrir næsta leik sem verður í Stykkishólmi á fimmtudag.

Keflavík - Snæfell 97-78 (53-41)

Stig Keflavíkur: Urule Igbavboa 20 (10 fráköst), Hörður Axel Vilhjálmsson 20, Draelon Burns 20, Sigurður Þorsteinsson 11, Gunnar Stefánsson 9, Gunnar Einarsson 7, Jón Nordal Hafsteinsson 4, Þröstur Leó Jóhannsson 2, Sverrir Sverrisson 2, Davíð Þór Jónsson 2.

Stig Snæfells: Hlynur Bæringsson 22 (13 fráköst), Sigurður Þorvaldsson 20, Jón Ólafur Jónsson 6, Sveinn Davíðsson 6, Sean Burton 6, Pálmi Sigurgeirsson 4, Martins Berkis 3, Kristján Andrésson 3, Emil Jóhannsson 3, Gunnlaugur Smárason 3, Páll Helgason 2.