Aron Kristjánsson: Hlynur er að verja alltof mikið frá okkur

Aron Krisjánsson, þjálfari Hauka, þarf að reyna að fá sína menn til þess að mæta af meiri krafti í leikina því annan leikinn í röð misstu þeir Valsmenn langt fram úr sér í úrslitaeinvígi liðanna um Íslandsmeistaratitilinn. Haukarliðið bjargaði sér í fyrsta leiknum en varð að sætta sig við tap í dag.

„Við vorum því miður of seinir að taka við okkur í dag og það vantaði aðeins upp á hungrið. Það vantaði tíu til fimmtán prósent upp á baráttuna í byrjun leiks og við vorum of slakir í varnarleiknum okkarm" sagði Aron.

„Þegar við lendum í mótlæti í seinni hálfleik, fáum mikið af brottvísunum og lendum sex mörkum undir þá er eins og liðið vakni. Við náum að éta okkur aftur inn í leikinn en því miður náðum við ekki að tryggja okkur framlengingu. Það munaði litlu hjá okkur en þetta var ekki nóg," sagði Aron.

„Við vorum 1-0 yfir og kannski hafa mínir menn fundið eitthvað öryggi í því. Staðan er 1-1 núna og við þurfum bara að mæta tvíefldir til leiks á þriðjudaginn," segir Aron.

„Það er hellingur að hlutum sem við getum lagað í okkar leik en mér fannst við vera að gera marga hluti vel sóknarlega og þá þessa hluti sem við vorum búnir að vera tala um að bæta. Við þurfum að taka það með okkur áfram en hinsvegar þurfum við að skjóta miklu betur á Hlyn í markinu. Hann er að verja alltof mikið frá okkur," sagði Aron.

„Mér fannst við finna ýmsar lausnir á þeirra varnarleik sem var að virka hjá okkur en við vorum að skjóta mjög illa á markið," sagði Aron

„Mér fannst við vera sjálfum okkur verstir í þessum leik og því miður fór þetta svona. valsararnir voru með frumkvæðið allan leikinn og lönduðu verðskulduðum sigri," sagði Aron að lokum.