Ingi Þór: Þeir svöruðu vel í dag enda með frábært lið

Ingi Þór Steinþórsson, þjálfari Snæfells, þurfti að horfa upp á sína menn tapa með 19 stigum fyrir KR á heimavelli sínum í Hólminum í kvöld í öðrum leik liðanna í undanúrslitum úrslitakeppni Iceland Express deildar karla. Snæfell gat komist í 2-0 í einvíginu og þar með í algjöra lykilstöðu en nú er staðan orðin 1-1 og KR er aftur komið með heimavallarréttinn.

„Við gerðum þeim þetta mjög auðvelt með þeim að gefa þeim eftir stöðubaráttuna út um allan völl. Þeir voru grimmir sem að við vissum að þeir myndu vera en við misstum þá of mikið fram úr okkur. Við vorum komnir 18 stigum undir í hálfleik og það fékk allt með þeim," sagði Ingi Þór.

KR var 52-34 yfir í hálfleik þar sem liðið setti niður 6 af 10 þriggja stiga skotum og vann fráköstin 26-13.

„Þetta var alveg eins og í KR-heimilinu. Við vorum grimmir þar og unnum þá fyrir öllum lausu boltunum. Við vorum þá heppnir á tímum og það féll allt með okkur. Þeir svöruðu vel í dag enda með frábært lið og svona koma frábær lið til baka. Við ætlum að sýna það sama í næsta leik," sagði Ingi.

„Heimavöllurinn er KR-ingum dýrmætur og þeir eru búnir að vinna hann aftur. Við erum búnir að vinna þá einu sinni og getum alveg unnið þar aftur. Við ætlum bara að fara yfir það sem við þurfum að gera betur og lagfæra það," sagði Ingi.

„Morgan Lewis var frábær hér í kvöld og við áttum eiginlega ekkert svar við honum í fyrri hálfleik. Tommy Johnson átti líka skínandi leik og það voru allir að spila vel hjá þeim. Stöðubaráttan var þeirra og við áttum ekki svar við þeim í kvöld," sagði Ingi að lokum.