Patrekur sér ljósa punkta þrátt fyrir fimmtán marka tap

Þrátt fyrir fimmtán marka tap sá Patrekur Jóhannesson, þjálfari Stjörnunnar, nokkra ljósa punkta í leik liðsins gegn Akureyri í kvöld. Lokatölur voru 36-21 þar sem Stjörnumenn gerðu aragrúa mistaka.

„Þetta leit ágætlega út þegar Akureyri var í 3-2-1 vörn og ég var að vona að þeir myndu ekkert breyta því. Í stöðunni 15-12 skora þeir fimm mörk í röð og það gerði okkur erfitt fyrir. Við vorum inn í þessu til að byrja með en svo fjaraði þetta út. Við gerðum alltof mikið af mistökum og þegar við erum að reyna að minnka muninn klikkum við á dauðafærum ofan á allt."

„Það eru samt jákvæðir punktar í þessu og þetta var betra en gegn HK. Það var ákveðinn karakter í mönnum og Svavar varði til dæmis vel. Varnarleikurinn var allt í lagi en sóknarleikurinn var ekki í lagi. Vörnin þeirra var alveg á sex metrunum og þeir stigu ekkert skrefið út. Við hefðum þurft betri skot en við erum ekkert með hæsta liðið í deildinni."

„Þetta fjaraði eiginlega bara út í seinni hálfleik. Okkar möguleiki fólst í að ná góðri vörn og hraðaupphlaupum, ég vissi að það er það sem Akureyringar eru mjög góðir í. Því miður tókst það ekki og þeir kláruðu okkur bara. Þeir voru bara sterkari í dag eins og tölurnar gefa til kynna. Þeir voru góðir og dómgæslan var fín, það er gaman að koma hingað."

„Það stefnir bara í þriggja liða baráttu á botninum og það hefur ekkert breyst. Við þurfum að laga ákveðna hluti en það er enginn uppgjafartónn í okkur," sagði Patrekur.