Umfjöllun: Framarar of sterkir fyrir andlausa FH-inga

Framarar unnu frábæran sigur á FH-ingum, 33-38, í fimmtu umferð N1-deildar karla í kvöld en leikurinn fór fram í Kaplakrika. Gestirnir höfðu undirtökin nánast allan leikinn  en FH-ingar voru samt alltaf við hæla þeirra.

Bæði þessi lið hafa sýnt fína takta  það sem af er vetri og eru til alls líkleg á þessu Íslandsmóti. FH-ingum er spáð meistaratitlinum  í ár og hafa þeir náð vel saman á tímabilinu, en fyrir leikinn í kvöld voru þeir í þriðja sæti deildarinnar með sex stig .

Framarar voru aftur á móti ákveðið spurningarmerki fyrir mótið en Safamýrapiltar hafa byrjað tímabilið ágætlega og sátu í 4.sæti N1-deildarinnar með fjögur stig fyrir leikinn . Mjög svo mikilvægur leikur fyrir bæði lið og menn gátu búist við handboltaveislu í kvöld.

Jafnræði var með liðunum í byrjun leiks og eftir tíu mínútur var staðan 6-6 en þá fóru gestirnir í Fram í gang og skoruðu þrjú mörk í röð. Framarar voru að leika virkilega vel í fyrri hálfleik  en FH-ingar einbeitu sér meira af því að tuða í dómurum leiksins heldur en að spila handbolta.

Heimamenn fengu fimm sinum  tveggja mínútna brottvísun í fyrri hálfleik og það reyndist þeim dýrkeypt. Staðan í hálfleik var 17-15 fyrir gestina og mega heimamenn þakka Pálmari Péturssyni fyrir það að munurinn var ekki stærri en hann varði virkilega vel í hálfleiknum.

Framarar héldu uppteknum hætti í síðari hálfleik en þeir skutu til að mynda níu sinum að marki FH á fyrstu tíu mínútum síðari hálfleiksins og ekkert þeirra fór forgörðum.

Fljótlega náðu þeir fimm marka forystu í seinni hálfleik og FH-ingar áttu erfitt með að brúa það bil.

Sóknarleikur FH-inga var tilviljunarkenndur og varnarleikur þeirra algjörlega í molum.  Logi Geirsson ,leikmaður FH, var ekki leikfær í kvöld vegna meiðsla, en það hafði greinilega mikil áhrif á spilamennsku liðsins.  Leiknum lauk með sanngjörnum sigri Fram, 33-38.

FH - Fram 33-38 (15-17)

Mörk FH (skot): Sverrir Garðarsson 8 (11), Ólafur Guðmundsson 7 (17), Ásbjörn Friðriksson 5/1(10/1), Ólafur Gústafsson 3 (4), Brynjar Geirsson 3 (7), Sigurgeir Árni Ægisson 2 (2), Atli Rúnar Steinþórsson 2 (3),  Hermann Ragnar Björnsson 2 (4), Ari Magnús Þorgeirsson 1 (1).

Varin skot: Pálmar Pétursson 10 (24/2, 41%),

Daníel Freyr Andrésson 9/1 (14/2, 64%).

Hraðaupphlaup: 2 (Ólafur Guðmundsson ,Sverrir).

Fiskuð víti: 1 (Ólafur Guðmundsson).

Utan vallar: 14 mínútur.

Mörk Fram (skot): Einar Rafn Eiðsson 12/4 (16/5), Jóhann Gunnar Einarsson 5 (12), Magnús Stefánsson 4 (5), Halldór Jóhann Sigfússon 4 (8), Andri Berg Haraldsson 4 (9), Haraldur Þorvarðarson 3 (5), Róbert Aron Hostert  2 (6),Sigfús Páll Sigfússon 2 (2) ,Kristján Svan Kristjánsson 2 (2).

Varin skot: Magnús Gunnar Erlendsson  12 (27/1, 44%), Björn Viðar Björnsson 3(6, 50%) 

Hraðaupphlaupsmörk: 8 ( Einar Rafn Eiðsson 4, Matthías Daðason, Jóhann Gunnar, Jóhann Karl, Haraldur Þorvarðarson)

Fiskuð víti: 5 (Róbert Aron, Andri Berg 2, Halldór Jóhann,Magnús)

Brottvísanir: 10 mínútur

Dómarar: Hafsteinn Ingibergsson og Gísli Jóhannsson voru ágætir en misstu stundum tök á leiknum.