Snæfellingar með 21 árs gamlan Letta á reynslu

Íslandsmeistarar Snæfells í körfubolta karla eru með 21 árs gamlan Letta á reynslu hjá sér og spilaði hann með liðinu á móti Fjölni í átta liða úrslitum Lengjubikars karla á sunnudagskvöldið. Þetta kemur fram á heimasíðu Snæfells.

Lauris Mizis er 21 árs framherji sem átti ágætan leik á móti Fjölni þar sem hann var með 10 stig, 8 fráköst og 2 varin skot á 19 mínútum í leiknum en hann skoraði 8 af stigum sínum af vítalínunni.

Snæfell hefur þegar samið við tvo erlenda leikmenn, þá Sean Burton (17 stig og 5 stoðsendingar á móti Fjölni) og Ryan Amaroso sem var með 20 stig og 12 fráköst í Fjölnisleiknum.

„Á næstu dögum mun það svo koma í ljós hvort hann verði í plönum Inga Þórs fyrir tímbilið. Lauris hefur verið mikið stígandi með hverri æfingunni," segir í fréttinni um kappann af heimasíðu Snæfells.