Magnús Erlendsson valinn besti leikmaðurinn

Magnús Erlendsson markvörður Framara var valinn besti leikmaður þriðja og síðasta hluta N1-deildar karla en valið fyrir umferð 15 til 21 var tilkynnt í hádeginu. Gunnar Magnússon, þjálfari HK, var valinn besti þjálfarinn í þessum síðustu sjö umferðum deildarkeppninnar.

Magnús Erlendsson átti margar frábæra leiki í marki Fram í síðustu sjö umferðum mótsins en Fram vann fimm af sjö leikjum sínum í þriðja þriðjungnum og bjargaði sér frá falli.

Gunnar Magnússon stýrði HK-liðinu inn í úrslitakeppnina á lokasprettinum ekki síst þökk sé tveimur glæsilegum sigrum á deildarmeisturum Hauka og á Akureyringum fyrir norðan.

Haukamaðurinn Sigurbergur Sveinsson var eini leikmaðurinn sem komst í öll þrjú úrvalslið vetrarins en Oddur Gretarsson úr Akureyri, Arnór Þór Gunnarsson úr Val, Bjarni Fritzson úr FH og Atli Ævar Ingólfsson úr HK vpru allir í liðinu í annað skiptið í vetur.

Úrvalsliðið fyrir umferð 15 til 21 er þannig skipað:

Markvörður: Magnús Erlendsson, Fram

Vinstra horn: Oddur Gretarsson, Akureyri

Vinstri skytta: Sigurbergur Sveinsson, Haukum.

Miðjumaður: Fannar Þór Friðgeirsson, Val

Hægri skytta: Arnór Þór Gunnarsson, Val

Hægra horn: Bjarni Fritzson, FH

Línumaður: Atli Ævar Ingólfsson, HK

Önnur verðlaun sem veitt voru í dag:

Besti leikmaður: Magnús Erlendsson, Fram

Besti þjálfari: Gunnar Magnússon, HK

Bestu dómrarar: Anton Gylfi Pálsson og Hlynur Leifsson.

Besta umgjörð: Akureyri