Tómas Ingi: Missum þrjú stig út af eigin aulaskap

Tómas Ingi Tómasson, þjálfari HK, sá sína menn fara illa að ráði sínu í fyrsta heimaleiknum undir hans stjórn þegar HK tapaði 0-1 á heimavelli fyrir Þrótti í 1. deild karla í kvöld. Tómas Ingi var í viðtali við Guðmund Marinó Ingvarsson á Sporttv eftir leikinn.

„Þróttararnir refsuðu okkur fyrir eigin aulaskap. Mér finnst við hafa tapað leiknum en ekki að Þróttur hafi unnið hann. Við missum þrjú stig út af eigin aulaskap," sagði Tómas Ingi. HK var miklu betra í fyrri hálfleik en það var Þróttur sem komst yfir á 65. mínútu. HK lét síðan verja frá sér víti skömmu síðar og tókst ekki að opna vörn gestanna.

„Mér fannst við eiga báða hálfleikana en þeir voru miklu sterkari í seinni hálfleik. Þegar þeir ná að skora þá riðlast þetta svolítið hjá okkur. Ég fer að breyta og reyna að sækja stigið aftur en það tókst ekki og þeir fengu færi út af því," sagði Tómas Ingi.

„Það vantar svolítið broddinn í sóknarleikinn okkar í seinni hálfleik því þetta var rosalega mikið eiginlega og næstum því. Það hefur aldrei verið gefið mikið fyrir það í fótbolta og það var því miður ekki þannig heldur í kvöld. Barcelona tapaði leik um daginn þegar þeir voru 80 prósent með boltann. Það telur bara ekki og við verðum að vera beinskeyttari. Við erum of mikið að spila boltanum til hliðar og til baka. Ég vill að við spilum hraðar upp en það gekk bara ekki í dag," sagði Tómas Ingi.

„Þeir voru þéttir og ég held að þessi Dusan hafði skallað boltann svona 700 sinnum frá í leiknum. Þeir voru sterkir og eigum við ekki bara að segja að þeir hafi viljað þetta meira en við og þá sérstaklega í lokin," sagði Tómas Ingi.

„Ég er nokkuð sáttur við liðið og ég var mjög sáttur við liðið í fyrri hálfleik. Þó að við sköpum okkur engin dauðafæri þá erum við að spila fínan fótbolta. Við verðum að vera aðeins beittari og langa aðeins meira í þessi þrjú stig," sagði Tómas Ingi að lokum.