Umfjöllun: Þungu fargi létt af Valsmönnum

"Konni er kóngurinn," sungu leikmenn Vals inn í búningsklefa í kvöld eftir 22-23 sigur á Aftureldingu. Fyrsti sigur Valsmanna í vetur staðreynd og augljóslega þungu fargi létt af mönnum þar sem þeir fögnuðu líkt og þeir væru orðnir Íslandsmeistarar.

Sigurinn var ekki auðveldur og með meiri klókindum hefðu Mosfellingar fengið eitthvað úr honum. Þeir voru aftur á móti ekki klókir heldur klaufalegir og þess vegna fengu þeir ekkert úr leiknum.

Jafnræði var með liðunum framan af en í stöðunni 6-6 duttu Valsmenn í gírinn, skoruðu sex mörk í röð og komust í 6-12. Staðan í leikhléi var 7-12 fyrir Val.

Þeir skoruðu fyrstu tvö mörkin í síðari hálfleik og náðu sjö marka forskoti, 7-14. Þá hrundi leikur liðsins og heimamenn komu til baka af miklum krafti.

Þeir skoruðu sex mörk í röð og minnkuðu muninn í eitt mark, 13-14. Þegar rúmar 5 mínútur voru eftir jafnaði Afturelding loks leikinn, 20-20, og allt á suðupunkti síðustu mínúturnar.

Þá tóku Mosfellingar upp á því að láta reka sig út af hvað eftir annað fyrir klaufaleg brot. Valsmenn náðu þó ekki að hrista þá almennilega af sér heldur rétt mörðu sigur.

Lokamarkið var nokkuð umdeilt hjá Val enda fengu þeir að spila ansi lengi eftir að hendin var komin upp.

Sigurinn hafðist þó og það eitt skiptir máli fyrir Val. Liðið á samt enn langt í land og hrunið í síðari hálfleik var afar dapurt. Allt of margir lykilmenn liðsins eru að spila illa og geta svo miklu betur. Sturla var samt fínn meðan hans naut við og Ingvar varði þokkalega á köflum. Aðrir voru einfaldlega slakir.

Gamli jálkurinn Haukur Sigurvinsson var frábær hjá Mosfellingum í kvöld, Hafþór varði vel og Bjarni Aron kom sterkur upp í lokin. Það dugði ekki til í kvöld því þeir voru klaufar og höfðu ekki taugarnar til þess að klára leikinn.

Afturelding-Valur 22-23 (7-12)

Mörk Aftureldingar (skot): Bjarni Aron Þórðarson 7 (14), Haukur Sörli Sigurvinsson 6 (10), Jón Andri Helgason 4 (7), Daníel Jónsson 2 (7), Arnar Freyr Theodórsson 2 (6/1), Aron Gylfason 1 (2).

Varin skot: Hafþór Einarsson 18 (41/3) 44%.

Hraðaupphlaup: 4 (Haukur 2, Jón, Bjarni).

Fiskuð víti: 1 (Bjarni).

utan vallar: 14 mín.

Mörk Vals (skot): Sturla Ásgeirsson 5 (6), Valdimar Fannar Þórsson 5/2 (9/2), Ernir Hrafn Arnarson 4 (13/1), Alexandr Jedic 3 (6), Jón Björgvin Pétursson 2 (4), Fannar Þorbjörnsson 2 (3), Anton Rúnarsson 2 (4), Heiðar Þór Aðalsteinsson 1 (2).

Varin skot: Ingvar Guðmundsson 13 (35/1) 42%.

Hraðaupphlaup: 5 (Sturla 3, Fannar, Anton).

Fiskuð víti: 3 (Sturla, Jón, Ernir).

utan vallar: 2 mín.

Dómarar: Ingvar Guðjónsson og Magnús Jónsson, ágætir.