Ribery vill ekki fara til Englands

Franski vængmaðurinn hjá FC Bayern, Franck Ribery, segir að ekki komi til greina að fara frá félaginu yfir til Englands.

Man. Utd og Chelsea geta því lagt allar áætlanir um að fá hann til félagsins næsta sumar.

Ribery segist eingöngu vilja fara til Barcelona eða Real Madrid ef hann á annað borð fer frá Bayern.

„Ég er ekki búinn að taka ákvörðun um framtíðina. Ég veit ekki enn hvað sé best fyrir mig að gera. Ef ég aftur á móti fer frá Bayern þá fer ég til Spánar," sagði Ribery.

„Nú er þetta bara undir mér komið. Hvort ég vil fara til Barca eða Real eða vera hérna áfram. Hver svo sem ákvörðunin verður þá víl ég skrifa undir fimm ára samning næst."