Rakel: Okkar tími mun koma

Rakel Logadóttir, leikmaður Vals, var orðlaus eftir ótrúlegan 3-2 sigur Breiðabliks á Val í Pepsi-deild kvenna í kvöld.

Breiðablik skoraði tvívegis í uppbótartíma leiksins og tryggði sér þar með sigurinn eftir að Valur hafði verið með unnan leik í höndunum.

„Ég segi bara eins og forsætisráðherrann; okkar tími mun koma. Þetta mót er sko alls ekki búið. Höfum það alveg á hreinu," sagði Rakel en þessum tveimur liðum var spáð efstu tveimur sætunum fyrir mót.

Aðstæður gerðu leikmönnum erfitt fyrir en það var mikill vindur á leiknum í kvöld. „Aðstæðurnar buðu upp á hættulegan leik en við hefðum átt að halda einbeitingunni betur og klára þessar fáu mínútur sem eftir voru. Við getum bara sjálfum okkur um kennt."

„En þetta kemur til með að þjappa okkur saman. Í kvöld hugsum við málið en svo mætum við á æfingu á morgun og byrjum upp á nýtt."