Umfjöllun: Stjörnustúlkur unnu FH auðveldlega

Stjarnan vann öruggan sigur á FH 37-24 í Meistarakeppni kvenna í kvöld. Stjörnustúlkur unnu bæði Íslandsmeistaratitilinn og bikarinn á síðustu leiktíð en léku gegn FH í þessum leik þar sem Hafnarfjarðarliðið lenti í öðru sæti bikarsins.

FH-stelpur stóðu í Stjörnustúlkum í fyrri helming fyrri hálfleiks en getumunurinn milli liðanna kom bersýnilega í ljós eftir það. Eftir að staðan var jöfn 9-9 náði Stjörnuliðið völdum á vellinum og var með níu marka forystu í hálfleik 21-12.

Fyrir leikinn bjuggust flestir við að Stjarnan myndi vinna örugglega og það var raunin. Það var aldrei nokkur spurning í seinni hálfleiknum hvoru megin sigurinn myndi lenda heldur aðeins hversu stórt hann yrði.

Alina Tamasan, sem hét áður Alina Petrache, var markahæst í Garðabæjarliðinu með 10 mörk en Elísabet Gunnarsdóttir skoraði 8. Kristín Clausen komst einnig á blað hjá Stjörnustúlkum með tvö mörk en hún hafði gefið það út í sumar að hún hyggðist taka sér frí frá handknattleiksiðkun. Gleðiefni að henni snérist hugur.

Stjörnuliðið lítur mjög vel út fyrir tímabilið í N1-deildinni þó mótspyrnan í kvöld hafi reyndar ekki verið gríðarleg. Þessi leikur markar upphaf tímabils en keppni í deildinni hefst eftir viku.

Stjarnan-FH 37-24 (21-12)

Mörk Stjörnunnar: Alina Tamasan 10 (5 víti), Elísabet Gunnarsdóttir 8, Þorgerður Anna Atladóttir 5, Jóna Sigríður Halldórsdóttir 4, Indíana Nanna Jóhannsdóttir 2, Kristín Clausen 2, Harpa Sif Eyjólfsdóttir 2, Þórhildur Gunnarsdóttir 2, Fanney Ingvarsdóttir 1, Estger Viktoría Ragnarsdóttir.

Varin skot: Florentina Stanciu 19.

Mörk FH: Sigrún Gilsdóttir 6, Birna Berg Haraldsdóttir 5, Birna Íris Helgadóttir 3, Gunnur Sveinsdóttir 3, Ingibjörg Pálmadóttir 3, Ragnhildur Guðmundsdóttir 1 (1 víti), Hafdís Guðjónsdóttir 1, Heiðrún Rún Guðmundsdóttir 1.

Varin skot: Sigríður Arnfjörð Ólafsdóttir 5, Jolanta Slapikiene 4.