Lætur Seedorf tíuna af hendi?

Koma Brasilíumannsins Ronaldinho til AC Milan hefur eðlilega vakið mikla athygli á Ítalíu. Forvitni vekur hvort brasilíski töframaðurinn muni fá treyju númer 10 hjá Milan, en það verður að teljast nauðsynlegt í ljósi þess að fyrirtækið sem sér um ímynd hans heitir R10.

Það er þó ekki gefið að Ronaldinho fái treyju númer 10 hjá Milan, því það er enginn nýgræðingur sem er með það númer á bakinu - Hollendingurinn og reynsluboltinn Clarence Seedorf.

Seedorf var eini maðurinn í liði Milan sem var neikvæður á komu Ronaldinho til Milan í blaðaviðtölum, en ekki er langt síðan hann sagði að "Ronaldinho er ekki leikmaður sem við þurfum."

Ítalskir fjölmiðlar greindu frá því í morgun að margt benti til að þeir Ronaldinho og Seedorf væru mestu mátar því Hollendingurinn hefði þegar samþykkt að taka þátt í góðgerðarmálum með nýja liðsfélaga sínum.

Það verður svo að koma í ljós hvort Ronaldinho fær treyju númer 10 - og hvort hann þarf þá aðeins að beita brosinu eða buddunni til að tryggja sér það.