Inzaghi frá í þrjár vikur

Markaskorarinn Filippo Inzaghi hjá AC Milan verður frá keppni næstu þrjár vikurnar vegna kviðslits og eykur þar með enn á framherjavandræði liðsins.

Óttast var að hinn 34 ára gamli "Pippo" þyrfti að gangast undir aðgerð vegna meiðsla sinna en ekki kom til þess. Hann þarf engu að síður að hvílast í að minnsta kosti 20 daga áður en hann getur spilað með liði sínu á ný.

Hann var ekki með Milan í sigri þess á Empoli um helgina og missir m.a. af stórleik liðsins gegn Roma um næstu helgi. Inzaghi hefur þegar misst úr marga leiki vegna meiðsla í vetur og eins og flestir vita spilar Ronaldo ekki meira með liðinu á leiktíðinni vegna hnémeiðsla. Þá hefur framherjinn Alberto Gilardino ekki beinlínis verið á skotskónum.