Rafmagnsbyssurnar eru umdeildar og til dæmis eru samtökin Amnesty international á móti þeim. Fjölmargar fréttir hafa verið sagðar af því að menn hafi látist eftir að hafa fengið í sig skot úr rafbyssum.
Lögreglumenn segja á móti að rannsóknir á þessum dauðsföllum hafi nær undantekningalaust leitt í ljós að byssurnar hafi ekki valdið þeim, heldur ofneysla eiturlyfja eða aðrir þættir.
Engin 50 þúsund volt
Það er útbreiddur misskilningur að rafbyssurnar veiti 50 þúsund volta stuð. Þær framleiða að vísu 50 þúsund volta straum. En stuðið sem þær veita þegar þeim er skotið í fólk er mælt í amperum. Og byssurnar veita ekki ekki nema 0.0021 ampera stuð. Venjuleg rafmagnsinnstunga á heimili er 13 amper.
Skot úr byssunum hafa engin áhrif á hjartagangráða sem þola 800 sinnum meiri truflun.
Lögreglan segir að mönnum sé margfallt minni hætta á meiðslum ef þeir eru yfirbugaðir með rafbyssum í stað þess að vera beittir lögreglutökum eða kylfum, hvað þá venjulegum skotvopnum.
Þeir sem ráðast á lögreglumenn eða veita þeim mótspyrnu eru oftast í mikilli geðshræringu sem gefur þeim mjög aukið afl. Það getur því verið erfitt að yfirbuga þá nema beita mikilli hörku og ofbeldi. Með rafbyssu eru þeir gerðir óvirkir á sekúndubroti.
Bjargað mörgum mannslífum
Kanadiska lögreglan gengur svo langt að segja að rafmagnsbyssur hafi bjargað 4000 mannslífum síðan byrjað var að nota þær árið 1999. Lögreglan í Queensland í Ástralíu segir að byssurnar hafi mikinn fælingarmátt. Oft sé nóg að ógna með þeim. Árásum á lögregluþjóna í vestur Ástralíu þar sem rafbyssur eru notaðar hafi fækkað um 40 prósent.
Miklar rannsóknir
Breska lögreglan hefur rafmagnsbyssur. Þær voru teknar í notkun eftir prófanir og rannsóknir sem eru sagðar þær umfanagsmestu sem nokkrusinni hafi verið gerðar á valdbeitingartæki.
Gagnrýnendur þessara vopna segja hættu á að lögreglumenn misnoti þau. Í nýjustu byssunum eru bæði kvikmyndavélar og hljóðupptökutæki sem skrá niður nákvæmlega hvernig hún er notuð.
