Zambrotta ætlar að enda ferilinn á Ítalíu

Gianluca Zambrotta hefur verið talsvert orðaður við AC Milan. Þessi þrítugi leikmaður er hjá Barcelona en fer ekki leynt með að hann ætlar að enda feril sinn í ítölsku deildinni.

„Ég vil ekkert tjá mig um þessar fréttir varðandi AC Milan. Það er hinsvegar ekkert leyndarmál að ég ætla að ljúka ferlinum á Ítalíu. Ég sakna landsins talsvert, mest sakna ég ættingja minna og vina," segir Zambrotta.

Eiginkona Zambrotta er einnig með heimþrá og vill flytjast til Ítalíu á ný. AC Milan fylgist grannt með gangi mála en Silvio Berlusconi, forseti félagsins, segir það nánast frágengið að Zambrotta komi til félagsins.