Dunga tilbúinn að velja Amauri

Landsliðsframtíð Amauri, leikmanns Juventus, hefur mikið verið rædd á Ítalíu. Hann á möguleika á því að spila með ítalska landsliðinu á næsta ári eftir að hafa ekki verið í myndinni hjá Carlos Dunga, landsliðsþjálfara Brasilíu.

Amauri er fæddur í Brasilíu en hefur lengi búið á Ítalíu og er giftur ítalskri konu. Marcello Lippi, þjálfari Ítalíu, hafði gefið það út að hann væri að skoða möguleikann á því að Amauri leiki fyrir ítalska landsliðið.

En nú virðist Dunga hinsvegar hafa skipt um skoðun og er tilbúinn að velja Amauri til að spila fyrri Brasilíu. „Julio Cesar (markvörður Inter) hafði samband við mig og gaf Amauri sín meðmæli," sagði Dunga.

„Maður getur treyst Julio og ég er tilbúinn að velja Amauri svo lengi sem hann gerir ekki kröfur um byrjunarliðssæti. Umboðsmaður hans verður að hætta að láta það út úr sér að hann spili bara fyrir Brasilíu ef hann á öruggt sæti í byrjunarliðinu."

„Það er ekki hægt að gera svona kröfur. Fólk sem þekkir mig veit að svona yfirlýsingar fara í taugarnar á mér. Ekki einu sinni Pele var lofað sæti í liðinu á sínum tíma. Ég vel liðið og Amauri verður að lúta sömu reglum og Kaka og Ronaldinho gera," sagði Dunga.

Amauri ætti að fá ítalskan ríkisborgararétt um áramótin en hann hefur skorað 11 mörk fyrir Juventus það sem af er tímabili. Ítalía og Brasilía mætast í vináttulandsleik í febrúar og enn er ekki ljóst með hvoru liðinu Amauri mun spila eða hvort hann spili yfir höfuð þann leik.