Barcelona gerði jafntefli við Recreativo - Eiður spilaði

Barcelona varð að gera sér að góðu 2-2 jafntefli við Recreativo á útivelli í spænsku úrvalsdeildinni í kvöld. Samuel Eto´o gerði bæði mörk Barcelona. Eiður Smári Guðjohnsen var í byrjunarliði Barcelona í kvöld en var skipt af velli eftir rúmlega klukkutíma.

Eiður átti fínan leik og var sérstaklega góður í fyrri hálfleiknum. Það breytir ekki þeirri staðreynd að Barcelona heldur áfram að valda vonbrigðum í deildinni og bilið gæti breikkað enn milli liðsins og toppliðs Real Madrid á morgun.

Leikurinn í kvöld var þó ekki eintómur dauði og djöfull fyrir Katalóníuliðið, því Leo Messi kom inn sem varamaður og lék síðustu 20 mínúturnar. Hann hefur átt við meiðsli að stríða undanfarinn mánuð. 

Real Madrid er í efsta sæti deildarinnar með 66 stig, Barcelona er með 60 og spútniklið Villarreal hefur 59 stig og getur komist upp fyrir Börsunga með sigri á morgun.