Titringur í kring um Ronaldinho

Óvíst þykir að Brasilíumaðurinn Ronaldinho muni leika með AC Milan annað kvöld þegar liðið mætir FC Zurich í Uefa keppninni.

Fjölmiðlar hafa haldið því fram að kappinn hafi verið heldur lengi úti á lífinu í Rio í heimalandinu eftir landsleik í síðustu viku, en Ronaldinho þótti afleitur í deildarleik með Milan um síðustu helgi þar sem liðið tapaði enn einum leiknum.

Sagt er að Ronaldinho hafi fundað með varaforseta Milan í gær og haldið því fram að fréttir af gleðskap hans og félaga hans í brasilíska landsliðinu hafi verið stórlega ýktar.