Food & Fun heppnaðist vel

Húsfyllir var á matarhátíðinni Food & Fun sem fór fram Við Pollinn á Ísafirði um helgina. „Hátíðin heppnaðist mjög vel. Hún gekk alveg snurðulaust fyrir sig og matseðill gestakokksins vakti lukku heimamanna, við höfum allavega ekki orðið varir við annað“, segir Eiríkur Gísli Johansson, annar eigandi veitingarstaðarins. Það var Ingi Þórarinn Friðriksson frá Perlunni sem skrifaði fjórrétta matseðill sem samanstóð af verður marineraðri lúðu, frosnum ávaxtadrykk, nautalund og sítrónuböku í eftirrétt. Matarhátíðin Food & fun, sem myndi útleggjast á íslensku sem Fóður og fjör, hefur á undanförnum árum áunnið sér veglegan sess í borgarlífinu í febrúar og nú tóku ellefu veitingastaðir úti á landi þátt í að bjóða upp á spennandi matseðil í stórbrotinni íslenskri náttúru yfir vetrartímann.

„Ég vona að það verði framhald á hátíðinni úti á landi. Frá okkar bæjardyrum tókst þetta mjög vel og við erum spenntir að fá að taka þátt aftur á næsta ári“, segir Eiríkur.

thelma@bb.is