Leit hætt að blöðrupresti

Yfirvöld í Brasilíu hafa hætt leit að prestinum sem reyndi að setja met í flugi með helíumfylltum blöðrum.

Líklega hefði verið betra fyrir prestinn að hafa með sér björgunarvesti. Veðurguðirnir voru honum nefnilega ekki hliðhollir og vindurinn bar hann á haf út.

Nokkrum klukkustundum eftir flugtak hringdi hann úr farsíma sínum. Hann sagðist eiga í vandræðum með gps staðsetningartæki sitt og að hann væri að hrapa í sjóinn.

Mikil leit var gerð, bæði úr lofti og á sjó. Blöðrurnar fundust á floti í sjónum, en séra Adelir hefur ekki fundist.