Mál Pistorius fyrir áfrýjunardómstól

Mál Suður-Afríkumannsins Oscar Pistorius fer fyrir alþjóðlegan áfrýjunardómstól á morgun.

Pistorius notast við sérstakan búnað frá íslenska stoðfyrirtækinu Össuri en hann missti báða fætur fyrir neðan hné þegar hann var barn.

Í janúar síðastliðnum úrskurðaði Alþjóða frjálsíþróttasambandið (IAAF) að Pistorius væri óheimilt að keppa í hefðbundnum keppnisgreinum í hlaupaíþróttum þar sem búnaðurinn veitti honum ósanngjarnt forskot á aðra keppendur.

Össur gerði alvarlegar athugasemdir við niðurstöðu IAAF en málið verður tekið fyrir á morgun og stenda málaferli yfir í tvo daga. Niðurstöðu er svo að vænta á næstu vikum.

Niðurstaða IAAF er byggð á rannsókn Gert-Peter Brüggemann, þýsks prófessors sem komst að þeirri niðurstöðu að Pistorius noti 25 prósent minni orku en ófatlaðir hlauparar.

Því er Pistorius ósammála og hefur gengist undir próf og rannsóknir í Bandaríkjunum til að sanna mál sitt.

„Ég er mjög ánægður með að málið sé tekið fyrir nú því það gefur mér tækifæri til að ná lágmarki fyrir Ólympíuleikana í Peking," sagði hann.

Fyrir fjórum árum vann hann gullverðlaun á Ólympíuleikum fatlaðra í Aþenu í 200 metra hlaupi. Hann á heimsmet fatlaðra í 100 m, 200 og 400 m hlaupi.

Hann varð í öðru sæti í 400 m hlaupi á meistaramóti Suður-Afríku þar sem hann keppti við ófatlaða hlaupara.

Hér að neðan má sjá samanburð á heimsmetum hans í keppni fatlaðra og hins vegar heimsmetum í 100 m, 200 m og 400 m hlaupi.

100 metra hlaup:

Heimsmet: 9,74 sekúndur (Asafa Powell, Jamaíku, sett 2007)

Pistorius: 10,91 sekúnda (sett 2007)

A-lágmark fyrir ÓL 2008: 10,21 sekúndur

B-lágmark: 10,28 sekúndur

200 metra hlaup:

Heimsmet: 19,32 sekúndur (Michael Johnson, sett 1996)

Pistorius: 21,58 sekúndur (sett 2007)

A-lágmark: 20,59 sekúndur

B-lágmark: 20,75 sekúndur

400 metra hlaup:

Heimsmet: 43,18 sekúndur (Michael Johnson, sett 1999)

Pistorius: 46,56 sekúndur (sett 2007)

A-lágmark: 45,55 sekúndur

B-lágmark: 45,95 sekúndur