Færeyingar efstir og neðstir

Gengi færeyska olíuleitarfélagsins Atlantic Petroleum hefur lækkað um 2,39 prósent eftir að viðskipti hófust í Kauphöll Íslands í dag en þetta er mesta lækkun dagsins. Gengi félagsins hefur rokið upp um l80 prósent síðan það féll í óróleika á fjármálamörkuðum í ágúst og stendur nú nálægt sínu hæsta gildi, sem náðist í gær. Á sama tíma hefur gengi Föroya banka hækkað mest í dag.

Gengi færeyska bankans hefur dalað nokkuð frá því viðskipti hófust með bréf í bankanum og stendur það nú í 218 krónum á hlut.

Að öðru leyti er tiltölulega lítil hreyfing í Kauphöllinni.

Úrvalsvísitalan hefur lækkað um 0,19 prósent og stendur hún í 8.097 stigum. Vísitalan hefur hækkað um 26,30 prósent frá áramótum.