Fjórir af Minnesota-sexburunum látnir

Einungis tveir af sexburunum sem fæddust í Minnesota 10 júní eru á lífi. Fjórði sexburinn lést á sunnudaginn. Þrír voru látnir þegar vika hafði liðið frá fæðingu. Ástand hinna tveggja eftirlifandi er tvísýnt. Forsvarsmenn sjúkrahússins þar sem fjölskyldan dvelur vildu ekki veita frekari upplýsingar að svo stöddu.

Sexburarnir fæddust fjórum og hálfum mánuði fyrir tímann. Þeir vógu aðeins 700 til 800 grömm og voru ekki mikið stærri en svo að þeir rúmuðust í mannslófa.

Foreldrarnir Ryan og Brianna Morrison höfðu lengi reynt að eignast börn áður en konan tók inn frjósemislyf.