Forstjóraskipti hjá Mærsk

22. júní 2007 09:45

Emma Mærsk, eitt skipa A.P. Möller-Mærsk og eitt stærsta gámaflutningaskip í heimi. Mynd/AFP

Nils Smedegaard Andersen hefur verið ráðinn forstjóri danska skiparisans A.P. Möller-Mærsk, eins stærsta skipafélags í heimi. Hann tekur ivð að Jess Søderberg í byrjun desember næstkomandi. Ráðningin kemur á óvart enda hafði Søderberg ekki ætlað að hætta fyrr en eftir tvö ár.

Andersen, sem er 48 ára, og hefur verið forstjóri danska bjórframleiðandans Carlsberg síðastliðin sex ár.

Søderberg er 62 ára og hefur starfað hjá Mærsk í 37 ár. Þar af hefur hann setið í forstjórastól fyrirtækisins frá árinu 1993. Hann ákvað hins vegar að setjast í helgan stein fyrr en áætlað var.

Nýr forstjóri hefur ekki verið ráðinn til Carlsberg en stefnt er að ljúka því áður en Andersen lætur af störfum.

Á sama tíma og Carlsberg hefur átt góðu gengi að fagna, ekki síst á síðastliðnum tveimur árum hefur afkoma Mærsk dregist saman, meðal annars vegna aukins kostnaðar í skipaflutningum.

Bandaríska fréttaveitan Bloomberg hefur eftir greinendum í Kaupmannahöfn að þeir undrist valið á Smedegaard. Hann komi úr smásöluverslun og hafi litla reynslu af rekstri fyrirtækja á borð við Mærsk.

Erlent Fréttir Viðskipti