Hráolíuverð hækkaði á fjármálamörkuðum

14. júní 2007 11:21

VIð dæluna. Greinendur í Bandaríkjunum telja að litlar umframbirgðir af eldsneyti geti komið illa niður á ökumönnum eftir því sem lengra líður á sumarið. Mynd/AFP

Heimsmarkaðsverð á hráolíu hækkaði lítillega á helstu fjármálamörkuðum í dag. Þetta er önnur hækkunin á tveimur viðskiptadögum en verðið hækkað um einn bandaríkjadal á tunnu í gær. Ástæðan fyrir hækkuninni nú er sú að lítil breyting varð á olíubirgðum í Bandaríkjunum á milli vikna.

Samkvæmt því sem fram kemur í vikulegri skýrslu bandaríska orkumálaráðuneytisins í gær var lítil breyting á olíubirgðastöðu Bandaríkjanna. Þetta er þvert á væntingar greinenda, sem höfðu gert ráð fyrir nokkurri hækkkun á milli vikna. Eldsneytisbirgðir drógust hins vegar saman á meðan birgðir af olíu til húshitunar jókst nokkuð á móti. Heildarbirgðirnar hafa dregist nokkuð saman undanfarnar vikur og eru undir meðaltalinu á sama tíma fyrir ári.

Verð á framvirkum samningum á hráolíu, sem afhent verður í næsta mánuði, hækkaði um 22 sent og stendur nú í 66,48 dölum á tunnu. Verð á Brent Norðursjávarolíu hækkaði á sama tíma um 45 sent og stendur í 70,39 dölum á tunnu.

Greinendur óttast að litlar olíubirgðir geti komið illa við Bandaríkjamenn enda muni eftirspurnin eftir eldsneyti aukast nokkuð eftir því sem líður á sumarið.

Erlent Fréttir Viðskipti