Segir Stuttgart eiga titilinn skilinn

Armin Veh, þjálfari nýkrýndra Þýskalandsmeistara Stuttgart, segir fráleitt að halda því fram að lið hans eigi titilinn ekki skilið. Leikmenn og forráðamenn Schalke létu hafa eftir sér eftir lokaumferðina í gær að lið sem væri á toppnum í þrjár vikur af 34 vikna tímabili ætti ekki skilið að standa uppi sigurvegari. Schalke var á toppi deildarinnar í 15 vikur í vetur.

"Þetta er mjög einfalt - það lið sem er á toppnum þegar tímabilið er á enda á skilið meistaratitilinn," sagði Veh við þýska fjölmiðla í morgun. Schalke tapaði tveimur af síðustu fjórum leikjum sínum í deildinni á meðan Stuttgart vann síðustu níu leiki sína og vann þar með upp sjö stiga forskot Schalke frá því í mars og gott betur.

Gríðarlegur múgur myndaðist í miðbæ Stuttgart í gærkvöldi eftir að meistaratitilinn var í höfn, sá fyrsti síðan 1991. Talið er að yfir 100 þúsund manns hafi dansað og sungið fram undir morgun og hyllt leikmenn liðsins.