Franskir framámenn kátir við kjötkatlana

Franska þjóðin virðist ekkert kippa sér upp við það að nýkjörinn forseti hennar skuli nú lifa í vellystingum pragtuglega á risastórri snekkju á Miðjarðarhafi. Snekkjan er í eigu auðkýfings sem er persónulegur vinur Nikulásar Sarkozys. Forsetinn pakkaði niður og flaug með einkaþotu til Möltu innan við 24 klukkustundum eftir að hann sigraði í forsetakosningunum.

Vinstri menn og aðrir andstæðingar Sarkozys ráku upp ramakvein. Einnig fjölmiðlar sem reiknuðu út í skyndi að það myndi kosta 17 milljónir króna á viku að leigja dolluna. Kjósendum virðist hinsvegar standa á sama. Um 58 prósent þeirra sáu ekkert ahugavert við það að Sarkozy tæki sér frí með þessum hætti eftir stranga kosningabaráttu.

Frakkar eru líka vanir því að forsetar þeirra hafi það gott. Í sinni kosningabaráttu á sínum tíma sagði Jacques Chiraq að hann myndi vera hófsamur forseti. Reyndin hefur orðið sú að hann hefur eytt yfir tuttugu milljónum króna á ári, bara í dýr vín.

Hann fjölgaði líka mjög í starfsliði foretans. Eiginkona hans hefur til dæmis tuttugu og einn starfsmann bara fyrir sig. Þar á meðal eru sex ritarar og tveir einkabílstjórar.