ACHTUNG !

Lucio býr í Aubstadt í suðurhluta Þýskalands. Hann skildi ekkert í því þegar hann fékk kvaðningu frá þýska hernum um að hann ætti að mæta til herþjónustu innan tíu daga. Ellegar hefði hann verra af. Lucio skilur satt að segja afskaplega lítið í flestum hlutum því hann er ekki nema fjögurra vikna gamall.

Talsmaður þýska hersins sagði að þótt alltaf væri þörf fyrir nýja hermenn þá væri nú ekki svo illa komið fyrir þeim að þeir væru farnir að munstra ómálga börn. Mistök hefðu verið gerð þegar fæðingardagur var sleginn inn í tölvu hersins. Talsmaðurinn sagði að hringt hefði verið í foreldra Lucios og þeim sagt að hann þyrfti ekki að mæta til herþjónustu.