Fjárfestar hættir við yfirtöku á Sainsbury

Fjárfestahóparnir CVC Capital, Blackstone Group og TPG Capital, áður Texas Pacific Group, sendu frá sér sameiginlega tilkynningu fyrir stundu þar sem fram kemur að þeir hafi hætt við að gera yfirtökutilboð í breska stórmarkaðinn Sainsbury. Ekkert verður því úr stærstu fyrirtækjakaupum í Bretlandi.

Sjóðirnir hækkuðu tilboð sitt úr 562 pensum á hlut í 582 pens í vikubyrjun auk ýmissa annarra loforða með það fyrir augum að auka líkurnar á því að veita viðskiptunum brautargengi. Sainsbury-fjölskyldan, sem fer með 18 prósenta hlut í þessari þriðju stærstu verslanakeðju í Bretlandi, setti sig hins vegar upp á móti boðinu og sagðist ekki taka neitt tilboð til umfjöllunar sem væri undir 600 pensum á hlut.

Eftir að nýja tilboðið var lagt fyrir fækkaði í fjárfestahópinum og stóð CVC Capital eitt eftir í gær.

Breska ríkisútvarpið hefur eftir tilkynningu fjárfestahópanna í dag að ekki sé útlit fyrir að stjórn Sainsbury muni vera fylgjandi yfirtökutilboði hópsins og því hafi hann ákveðið að draga sig í hlé.

Samkvæmt nýjasta tilboði fjárfestahópsins í Sainsbury var verslanakeðjan metin á 10,1 milljarða punda, jafnvirði ríflega 1.300 milljarða íslenskra króna. Hefði verið gengið að yfirtökutilboðinu hefði salan á Sainsbury verið stærstu fyrirtækjakaup í Bretlandi.

Gengi bréfa í Sainsbury lækkaði um þrjú prósent á markaði í Bretlandi eftir að greint var frá fréttunum þar í landi í dag og stendur nú í 522 pensum á hlut. Þetta er annar dagurinn í röð sem gengið lækkar en í gær lækkaði það um fjögur prósent eftir að tveir fjárfestahópar af þremur gengu frá borði.