Yahoo komið með leitarvél fyrir farsíma

Bandaríska netfyrirtækið Yahoo kynnti í gær leitarvél fyrir farsíma með vafra. Með leitarvélinni, sem heitir OneSearch, þykir Yahoo hafa náð nokkru forskoti á netleitarfyrirtækið Google sem hefur í bígerð að búa til svipaðan hugbúnað fyrir farsíma.

Fréttastofa Reuters segir að Yahoo muni í fyrstu horfa til þess að farsímanotendur í Bandaríkjunum geti notað leitarvélina en stefnt er að því að aðrir markaðir fylgi í kjölfarið.

Reuters segir tæknifyrirtæki keppast um að búa til hugbúnað fyrir farsíma með vöfrum því markaðurinn fari ört vaxandi. Þar á meðal eru póstforrit og fleira til.

Leitarvél Yahoo er þannig útbúin að farsímanotendur geta leitað eftir ýmsum staðbundnum upplýsingum, til dæmis með því að stimpla inn þá kvikmynd sem farsímanotendur langar til að sjá í bíó. Þar á eftir þarf að setja inn póstnúmer notanda og sýnir leitarvélin þá hvar hægt er að sjá tiltekna mynd og klukkan hvað hún er sýnd, svo eitthvað sé nefnt.

Yahoo hefur gert samninga við nokkra af helstu farsímaframleiðendum um innleiðingu hugbúnaðar frá fyrirtækinu í farsímum á þessu ári. Þar á meðal eru Nokia, Motorla, Samsung og LG, að sögn Reuters.